Despois de superadas moitas dificultades, como foron as relacionadas cos traxes, cos ensaios e cos músicos, o Grupo “Anaquiños da Terra” estreouse no día 6 de xaneiro de 1956, na festa de Reis. Esa noite foi, apoteótica.
Despois desta estrea seguíronse algunhas actuacións do Grupo fora da Casa: no Centro Español, no Festival de Coros no Espelho d’Água e na Radio Peninsular, todas elas baixo a dirección artística do noso querido e saudoso Artemio Laxe Carracedo, cun elenco de seis donas, un gaiteiro e unha ducia de rapaces.
Mentras Artemio tivo de ausentarse do Grupo por razóns persoais, xurde para rexer o Coro Anaquiños da Terra, Avelino Abuín de Teimbra, que na súa terra, Padrón, tiña axudado a iniciar un coro do cal fixo tamén parte. Dous anos mais tarde volve Artémio, e integrase de novo no Coro pero como gaiteiro, xa que Abuín segue rexendo o mesmo. Desde ese entón o Coro Anaquiños da Terra pasaba a ter dous gaiteiros.
Moitas foron as actuacións do Grupo baixo a rexencia de Abuín, destacándose as que se realizaron:
- No Coliseu dos Recreios, por ocasión do “Gran festival Galaico-Minhoto”
- Na Radio Portuguesa
Nese intre xa estaba como Presidente dos “Anaquiños da Terra” o saudoso Antonio Tomé Martínez e foi entón que se levantou a cuestión da falta de danzas no Grupo. O Artemio, nunha das súas visitas á terra, colocou un anuncio no “Faro de Vigo”, procurando un mestre que coñecese ben o tema. Apareceu Miguel, un mozo que facía parte do Grupo de Baile “Froles Mareliñas” de Chapela, en Vigo.
Para facer fronte ós gastos, máis unha vez o Grupo recorreu ás rifas e tivo a axuda do caro amigo Luís Seijo Garcia, de Celanova - Ourense, dono da “Pensión Imperial”, nos Restauradores, que cobraba metade do que valían as diarias. De recordar, tamén, a axuda da dona do que, na época. era Presidente da Xuventude de Galicia, D. José Varela Feijoo: ela debuxou e pintou, en pano de seda, o estandarte dos “Anaquiños da Terra”.
Foi durante os seis meses que estivo Miguel en Lisboa que as danzas melloraron dabondo, en especial a coreografía da “Muiñeira de Cabanas”, que aínda hoxe fai parte do repertorio do Grupo de danza “Anaquiños da Terra”.
Cando Abuín regresou a Padrón, a Dirección da Xuventude de Galicia deu autorización para contratar en Galicia un novo director para o Coro e a escolla recaeu en D. Francisco, segundo mestre na Banda Municipal de Santiago de Compostela. El estivo co Grupo apenas durante seis meses e, pasado ese tempo, volve Artemio a dirixir o Coro. Nese momento o “Coro Anaquiños da Terra” xa contaba con 35 elementos, incluíndo os gaiteiros. Foi tamén nesa ocasión que se incorpora ó Grupo “Anaquiños da Terra” o Paulo Marinho, por invitación do Artemio.
Moitas mais actuacións se sucederon:
- No Teatro D. María II, no Rossio, no acto de Homenaxe a Amélia Rei Colaço.
- No Teatro São Luiz, coa colaboración do Grupo de Teatro da Xuventude de Galicia.
- Na Faculdade de Letras de Lisboa.
- Nunha visita a Faro – Algarve, invitados pola Câmara Municipal.
- Nunha visita a Vila Nova de Mil Fontes - invitados por un empresario hoteleiro.
- Na RTP - Radiotelevisão Portuguesa, por 2ª vez.
- No Castelo de São Jorge – Lisboa, amenizando un xantar en que participaron, entre outros, D. Mariano Rajoy, daquela presidente da Deputación de Pontevedra, o Conselleiro Cuíña, e os Alcaldes de Ponteareas, de Covelo e da Cañiza.
- Ida á Sertâ, convidados pola Câmara Municipal. Neste momento xa era presidente dos “Anaquiños da Terra” o amigo Constantino Costal.
- No Festival no Teatro da Trindade, retransmitido para a América Latina pola Emisora Nacional.
Hai que destacar tamén o quinteto de pequenos gaiteiros, composto por dúas rapaciñas e tres rapaces.
Ó longo destes 53 anos de existencia, os “Anaquiños da Terra” teñen seguido divulgando a nosa Cultura e actuando nos mais distintos lugares e programas, podéndose destacar: o programa “Luar” da Televisión de Galicia, a RTP – Radiotelevisão Portuguesa, a Romaría de Sto. Amaro, a Beneficencia Española, a Aula Magna da Universidade de Lisboa.
Foi posible elaborar esta breve historia dos “Anaquiños da Terra” grazas a un libriño escrito polo “Anaquiño” e saudoso Amigo Artemio Laxe Carracedo que amablemente o ofreceu a algúns dos elementos do Grupo e á Xuventude de Galicia na persoa da entón Presidenta Dª. Hortensia Martínez, por ocasión da nosa Festa de Reis de 2004.
!Grazas Artemio, grazas Amadeu e a todos aqueles que de algunha forma contribuíron para o engrandecemento do Grupo “Anaquiños da Terra”!
O noso maior afán é poder continuar coa vosa obra.
Anaquiños da Terra
